John 11
Lasarus nagaꞋ eaꞋ
1Anona aman awes nandaꞋanai agel ananinai Lasarus. Anan naloma hanitiamana ananiwai biawa, Maria kwaloma Marta sape wambel anama Betani. Maria akwama atoꞋw nambimb kwokoloꞋwam sanda balaga Dembinai ma kondaꞋ auf balaga akoꞋunai kwundisamana boꞋwagah ananimi. 3EaꞋ awau wasapaꞋ basef mafeꞋma Jisas waꞋi, “Dembinai, aman anama ineꞋ okom nainailanai awes nandaꞋana naꞋoh.”4EaꞋ Jisas nameꞋ basef amama naꞋi, “Ina awes nandaꞋana ma neagaꞋ, owaꞋ. Anan awes nandaꞋana ma esis sefela agel aeꞋ Nogalomana Godi, eaꞋ sefela agel Godi wapotiꞋ.”
5EaꞋ Jisas okom nainaila Marta kwaloma owamaꞋw Maria waloma Lasarus. 6Anan nameꞋ basefa Lasarus awes nandaꞋana, eaꞋ anan ataꞋ napani nimeguf biam wapotiꞋ wambel anama napanima. 7Nimeguf biam mafeꞋma eaꞋ, naꞋipa alupumi ananimi naꞋi, “AfaꞋ deiꞋ otanima ofeꞋ etap hiagoma Judia.”
8EaꞋ alupumi ananimi magwamana basef maꞋi, “Dembinai tisa, nimbewaꞋ esis Juda saꞋi sokwaha otamba sehena afina, eaꞋ deiꞋ ineꞋ naꞋi netanima nefeꞋ anama wapotiꞋ, aꞋ amon?”
9EaꞋ Jisas nagwamama basef naꞋi, “Nemaf atotona awa 12-pelain nape. Emi egafis safeꞋ alipi esis ina sowa, owaꞋ. DeiꞋ main, esis sati hauguma etap anaeꞋ howalagon safeꞋ andeandeꞋ. 10EaꞋ iꞋi esis seafeꞋ owamb, atuwasi sowa. DeiꞋ main? Esis nagwapin howalagon aꞋas.”
11Jisas naꞋipam naꞋama ma eaꞋ, naꞋipam wapotiꞋ naꞋi, “Alupunai afaꞋinai Lasarus anan naꞋoh. AeꞋ atuwasi efeꞋ etap hiagoma Judia ma inimbalona.”
12EaꞋ alupumi ananimi magwamana basef maꞋi, “Dembinai, iꞋi anan noꞋoh etin, nambimb amboꞋona.”
13DoꞋok Jisas naliꞋ naꞋipam naꞋi Lasarus naꞋoh, naꞋi Lasarus nagaꞋ endilisi. EaꞋ alupumi ananimi ukup maꞋi anan ataꞋ naꞋoh etin.
14DeiꞋ Jisas naꞋipam alihim naꞋi, “Lasarus nagaꞋ endilisi. 15AeꞋ andanifel ma aeꞋ ina alomana wape atagon nemaf anan nagaꞋanai. Ama ipeꞋ atuwasi peambaleꞋefa aeꞋ. DeiꞋ afaꞋ ofeꞋma anan naꞋoma.”
16EaꞋ Tomas agel waꞋana Didimus naꞋipa anom alupumi Jisasi naꞋi, “AfaꞋ ofeꞋ wapotiꞋ ma ogaꞋ olomana.”
Ofagama epes sagaꞋ sohafel wapotiꞋ ma sofaꞋ ambal namunai, Jisas atona
17Lasarus nagaꞋ eaꞋ sawana. Nimeguf biamibiam mafeꞋ eaꞋ, Jisas nafiꞋi nataga. Anan nogawa Lasarus sawana nape hiꞋagif nimeguf biamibiam. 18Wambel anama Betani nape felefeleꞋma Jerusalem, siꞋi kilomita wenifin. EaꞋ amam Juda hiami mafiꞋi ma mondaꞋ opalef hanitiamana biawa Marta kwaloma Maria mope awanema anan hanitinamawa nagaꞋ. 20Marta kwameꞋ basefa Jisas nafiꞋi etin, kwafeꞋ kwatolona eaf, eaꞋ Maria ataꞋ kwapani ipat.21EaꞋ Marta kwafeꞋma Jisas kwaꞋipana kwaꞋi, “Dembinai, iꞋi ineꞋ nepe naꞋae, hanitiname aeꞋinai ina nogaꞋ, owaꞋ.”
22EaꞋ akwaꞋw kwaꞋipana wapotiꞋ kwaꞋi, “AeꞋ egawa ineꞋ deiꞋ atef nihaliꞋ Goda maim amamaga, anan niseꞋenam.”
23EaꞋ Jisas naꞋipakw naꞋi, “Hanitinamena nambimb nehafel wapotiꞋ.”
24EaꞋ Marta kwagwamana basef kwaꞋi, “AeꞋ egawa anan anona nemaf nehafel wapotiꞋ nemaf akutainai anama epes hiesi sagaꞋi seahafel wapotiꞋanai.”
25EaꞋ Jisas naꞋipakw naꞋi, “Ofagema epes seahafel wapotiꞋ ma sofaꞋ ambal namunai, aeꞋ atowe. Emi egafis seambaleꞋefa aeꞋi, anona nemaf sagaꞋ eaꞋ sehafel wapotiꞋ sefaꞋ ambal namunai sope andeandeꞋ laꞋelaꞋef. 26Emi epes ataꞋ sape namisa seambaleꞋefa aeꞋi, esis sope andeandeꞋ. Ina ataꞋ sogaꞋ wapotiꞋ, owaꞋetin. Sope laꞋelaꞋef hihif. IneꞋ nembaleꞋefa basef amama?”
27EaꞋ kwaꞋipana kwaꞋi, “AꞋe Dembinai, aeꞋ embaleꞋefa ineꞋ Krais, God nandandepena nasapaꞋena nafiꞋi. IneꞋ nogalomana ananinai, fowaꞋ anan naꞋi nifiꞋi etap anaeꞋ.”
Jisas nalef
28AkwaꞋw kwaꞋipana naꞋama, kotanima kwafeꞋma owamaꞋw Maria kwaꞋipakw saꞋosaꞋombel kwaꞋi, “Dembinai Tisa nafiꞋi nataga nofalena.”29Maria kwameꞋ basef amama etin, kohafel mehip kwafeꞋmana. 30Jisas ina deiꞋ nawisi wambel luꞋunai laꞋafen, owaꞋ. AtaꞋ napani wambel diꞋinai doꞋok Marta kwatagamana. 31Amam Juda mape maloma Maria nomon ipat awaunai maꞋi mondaꞋ okom akwaꞋunai laꞋifina. EaꞋ amam mati Maria kwahafel mehip kwafeꞋ. Amam ukup maꞋi akwaꞋw kwafeꞋ hiꞋagifa kwaꞋi kwealopana. EaꞋ magiꞋmokw mafeꞋ.
32EaꞋ Maria kwafeꞋma anama Jisas napoma kwatolona kundiwa nembawa felefeleꞋma boꞋwagah ananimi kwaꞋipana kwaꞋi, “Dembinai, iꞋi ineꞋ nepe nelomapa, hanitiname aeꞋinai ina nogaꞋ, owaꞋ.”
33Jisas nati akwaꞋw kwape kwalef etin eaꞋ nati amam Juda mafiꞋi malomaꞋw malef wapotiꞋ. EaꞋ nati esis uwahipis opaf ananinai aona endilisi naꞋi nelef etin. 34EaꞋ nahaliꞋas naꞋi, “IpeꞋ pawana eti?”
EaꞋ esis saꞋipana saꞋi, “Dembinai, fiꞋi netologon.”
35EaꞋ anan nalef.
36Amam Juda mati anan nalef naꞋama maꞋi, “IpeꞋ petolona! Anan okom nainailana endilisi.”
37EaꞋ anom maꞋi, “Aman anama maꞋuna nandaꞋ aman anama naep maseꞋanai ma deiꞋ naep matiana. Anan laꞋifinai ma fowaꞋ niliꞋ nifiꞋi ma niegiambama aman anama, deiꞋ nope o nogaꞋ?”
Jisas nafela Lasarus nohafel wapotiꞋ
38EaꞋ Jisas opaf nimanina endilisi nafeꞋ nataga hiꞋagif anama luꞋunai sagwasogon nawis owap luꞋunai. EaꞋ sandaꞋ anona owap luꞋunai sowalo uta.39EaꞋ naꞋipas naꞋi, “IpeꞋ lefatana owap anama nowalo utai.”
EaꞋ Marta hanitiꞋmana aman anama nagaꞋi kwaꞋi, “Dembinai, anan nape nimeguf biamibiam eaꞋ. DeiꞋ alogw awami eaꞋ mana.”
40EaꞋ Jisas naꞋipakw naꞋi, “FowaꞋ aliꞋ aꞋipina deiꞋ iꞋipina wapotiꞋ, iꞋi ineꞋ nembaleꞋefa aeꞋ, atuwasi niti nafifili pepel Godi.”
41EaꞋ esis selefatana owap anama eaꞋ Jisas naniga nati ilif naꞋi, “Ahalome, aeꞋ anifelina ma nameꞋe. AeꞋ egawa ineꞋ nameꞋe laꞋelaꞋef eaꞋ aeꞋ aꞋiam naꞋama ma esis amam nematawa saitu anaeꞋ sembaleꞋefa aeꞋ, ineꞋ nasapaꞋe afiꞋi.”
43Jisas nandaꞋ beten naꞋama eaꞋ, nofalana mehip naꞋi, “Lasarus, hafel niwisi andeꞋ.”
44EaꞋ aman anama nohafel nawisi andeꞋ. EaꞋ boꞋwagah maloma lagof amaga ananimi sandaꞋ lowaf sowaꞋana.
EaꞋ Jisas naꞋipas naꞋi, “IpeꞋ tagahamana luwaguf amama eaꞋ pekwahona nefeꞋ wafifina.”
Amam agufumi Judai maꞋi basef mandameꞋmama moha Jisas neagaꞋ
(Mt 26:1-5; Mk 14:1-2; Lu 22:1-2)
45Amam Juda hiami mafiꞋi mati Maria malomaꞋw malef, eaꞋ mati amama doꞋok Jisas nandaꞋami. EaꞋ mombaleꞋefana. 46EaꞋ anom mafeꞋma amam Farisi maꞋipama amama Jisas doꞋok nandaꞋami. 47EaꞋ amam pris dambami maloma amam Farisi hiami mofala anom dambami mafiꞋi mandakolasa mondaꞋ kot. EaꞋ maꞋi,“AfaꞋ atuwasi ondaꞋ maina aman anama nandaꞋ ikwaf anama laꞋifinai hianai? 48IꞋi ope weatolona ma nondaꞋ laꞋifimi amama, nambimb hiesi sombaleꞋefana. EaꞋ amam Rom nambimb mifiꞋi mohambombaga ipat luꞋunai Godi sandaꞋ lotuwanai noloma apeꞋ Juda hiapai wapotiꞋ.”
49EaꞋ anona aman agilinai Judai agelinama Kaiafas, anan dembinai pris nape naliꞋma pris hiami ma afagel anama naꞋipam naꞋi, “IpeꞋ ina pegawa anom amamaga, owaꞋetin. 50IpeꞋ ina deiꞋ pegawa anom basef, owaꞋ. IꞋi aman atotona neagaꞋma amam nematawa hiesi, naꞋama andeandeꞋma ipeꞋ. AfaꞋ wandaiwaꞋ ma esis seahambombaga apeꞋ Juda. NaꞋama epes hiesi apeꞋisi Juda higililas hiꞋilas.”
51Anan ina naꞋi basef amama ma okom ananinai atona, owaꞋetin. Anan nape pris dembinai afagel anama. EaꞋ naꞋi basef Ambal BuꞋunai Godi naꞋipanami siꞋi profet naꞋi Jisas nogaꞋ ma nigiambama esis Juda hiesi. 52Kaiafas naꞋi Jisas ina nogaꞋ nigiambama esis Juda etis, owaꞋ. Anan nogaꞋ ma nigiambama epes Godi hiesi sape safeꞋ etap hiagomai hiꞋilas nefaꞋas sotanimani, eaꞋ nondaꞋas sotaga epes hiesi wambota Godi atotona.
53Nemaf anama atona amam agufumi Judai maliꞋ maꞋi basef mandameꞋmama moha Jisas nogaꞋ. 54Anan nafeꞋ nandambahoꞋ etin felefeleꞋma anama wafiguma fatauguma ma wambel anama Efraim. Nape naꞋama naloma alupumi ananimi.
55Ina nogota laona ma esis Juda seagwaꞋ gwaꞋaimi luꞋwami saꞋi Pasova, owaꞋ. EaꞋ esis Juda hiesi sakwaha wambel asasinai safeꞋ Jerusalem atogon. SafeꞋma siela basef Godi fowaꞋimi sosaꞋof sotofa alogwa sondondomba alop asasinai ma God nieti esis boꞋwes andeandeꞋ ma seagwaꞋ gwaꞋaimi amama. 56Esis sape ipat luꞋunai Godi nomon sagolopa Jisas eaꞋ sahaliꞋas saꞋi, “IpeꞋ ukup mape maꞋimama? Anan atuwasi nifiꞋmai gwaꞋaimi amama o owaꞋ?”
57EaꞋ amam pris dambami maloma amam Farisi hiami maliꞋ maꞋi mehip maꞋiam maꞋi, “Emi egafis sogawa Jisas napoma siꞋipafa ofeꞋ ombaloꞋana ma weandaꞋmana basef.”
Copyright information for
AOJFILIFITA